កាហ្សាក់ស្ថាន៖ រដ្ឋមន្រ្តីការបរទេសអាមេរិក លោក Antony Blinken កាលពីព្រឹកថ្ងៃទី២៨ ខែកុម្ភៈនេះ បានធ្វើដំណើរទៅដល់ទឹកដីកាហ្សាក់ស្ថាន ក្នុងដំណើរមួយដែលមានគោលបំណងជំរុញបន្ថែមនូវតួនាទីរបស់សហរដ្ឋអាមេរិកនៅតំបន់អាស៊ីកណ្តាល ជាទឹកដីដែលស្ថិតនៅក្បែររបងរបស់ប្រទេសរុស្សី។ 

មន្រ្តីនៃរដ្ឋាភិបាលកាហ្សាក់ស្ថាន បានរៀបចំទទួលស្វាគមន៍បដិសណ្ខារកិច្ចចំពោះរដ្ឋមន្រ្តីការបរទេសររូបនេះ ក្រោមសីតុណ្ហភាពត្រជាក់ក្រោម ០អង្សារសេនារដ្ឋធានី អាស្តាណា (Astana) ជាទីដែលលោកនឹងជួបពិភាក្សាជាមួយប្រធានាធិបតីកាហ្សាក់ស្ថាន លោក Kassym-Jomart Tokayev មុននឹងបន្តដំណើរទស្សនកិច្ចទៅកាន់ប្រទេសអ៊ូបេគីស្ថានបន្តទៀត។ ក្រៅពីជំនួបជាមួយប្រធានាធិបតី លោក Blinken ក៏នឹងមានជំនួបជាមួយរដ្ឋមន្រ្តីការបរទេសនៃបណ្តាប្រទេសទាំងប្រាំជាអតីតទឹកដីក្រោមការដឹកនាំរបស់សហភាពសូវៀត ដែលបច្ចុប្បន្នជាសាធារណរដ្ឋនៅតំបន់អាស៊ីកណ្តាលរួមមាន គៀជីគីស្ថាន, តាជីគីស្ថាន និងតួកមេនីស្ថាន ជាដើម។

គួរឱ្យដឹងថា បើទោះបីជាប្រជាជាតិនៅតំបន់អាស៊ីកណ្ដាលភាគច្រើនមានទំនាក់ទំនងកិច្ចការសន្តិសុខ និងសេដ្ឋកិច្ចយូរអង្វែងជាមួយរុស្ស៊ីក្តី ក៏ប៉ុន្តែបណ្ដាប្រទេសទាំងនេះមិនបានប្រមូលគ្នាគាំទ្រពីក្រោយរុស្សីក្នុងសង្គ្រាមនេះដូចបេឡារុស្សឡើយ។ ជាក់ស្តែងប្រជាជាតិអាស៊ីកណ្តាលទាំងប្រាំបានអនុប្បវាទ និងមិនបានចូលរួមបោះឆ្នោតកាលពីសប្តាហ៍មុនឡើយ ទៅលើដំណោះស្រាយនៃមហាសន្និបាតរបស់អង្គការសហប្រជាជាតិ ដែលបានទាមទារឱ្យក្រុងម៉ូស្គូដកកងកម្លាំងរបស់ខ្លួនចេញពីអ៊ុយក្រែន។

ប្រទេសកាហ្សាក់ស្ថាន ដែលមានព្រំដែនដីគោកវែងជាងគេជាប់នឹងរុស្ស៊ី បានស្វាគមន៍ជនជាតិរុស្សីដែលភៀសខ្លួនចេញពីកាតព្វកិច្ចនៃការបម្រើយោធា ហើយបានអំពាវនាវឱ្យមានដំណោះស្រាយការទូតចំពោះសង្រ្គាមដោយគោរពទៅតាមច្បាប់អន្តរជាតិ។ កាលពីថ្មីៗនេះ ប្រធានាធិបតីកាហ្សាក់ស្ថាន លោក Tokayev បាននិយាយតាមទូរស័ព្ទជាមួយប្រធានាធិបតីអ៊ុយក្រែន លោក Volodymyr Zelensky បើទោះបីជាលោកក៏ធ្លាប់បានទៅជួបជាមួយលោក Putin ផ្ទាល់កាលពីឆ្នាំមុន ដើម្បីស្តារទំនាក់ទំនងប្រទេសទាំងពីរឡើងវិញយ៉ាងណាក្ដី៕